KUCH ASHAAR AUR

Dekh ke mail na hoga kabhi mera tujh say

Moud li main ne hain raahein teri raahon se paray

 

Jaane kyun har baat pe meri uthte hain sawaal

Mujhe har baat ko meri ab samjhna hai muhaal

 

Taarif nahin karte na tanqeed hai ab aati.

Mere likhe ki tum ko samajh hi nahin aati… J

 

Har kaam mein hai lagta , hoga ke yeh na hoga

Gum ho chuka hai mujh se kahin aitmaad mera

 

khwaab ki baat ho yaad, yeh mumkin kaise

Jab yaad nahin rehta jo hota hai haqeeqat mein

Kahani aur fasaana, maazi hain haqeeqat ke

Kyun yaad karein ab hum beeta bura zamana

Haafiza kamzor hota hai jab badhti hai umar

Dekh ke hone laga hai ,tujh pe bhi is ka ab asr

‘Khush raho’ kehte hain wo jaate huwe hum se

Hum kaise baateyin ke wajah ho khushi ki tum

 

Koshish dosti ki kari rahe ghair ke ghair

Unko to hai hum se khuda waste ka bair

 

Hote hain har ek baat ke do pehlu yehan pe

Pata nahin chalta ke ghalat kya hai sahi kya

 

ASHAAR

Kahan samaaye ga ab aa ke lutf ka pehlu

Jab fikron ko jagah di hai zehan ne mere

Kayee raahein  pohanchti  hain  manzil  ko magar

Jaane kis raah pe chala  main  ke jo manzil na mili

Ajab si kaifiat rehti hai ab mil ke sab se

Is daur ne apno ko bhi  paraaya hai kiya

Koi bhi khwaab na sharminda e  taabir huwa

Jaane kya kya yeh dikhaata hai zamana sapne

Kh’ta ho ke na ho ilzaam lage ga tum pe

Koi rishta bhi ab khoon ka rishta na raha

Dein kyun kar ke salah aaj kisi ko ke sambhal

Tu kahega ga bhala,  to bhi bura lage ga usay .

 

Soch das baar agar kehna hai kuch baat tujhe

Zara si der mein ban jaata hai raayee ka pahaad

Jaane kaise mere har raaz ko jaana sab ne

Shayad ke mere ashaar padhe hain sab ne

Main ne har baat to sighaa-e raaz rakha

Mere shaer mere jazbaat ka aaina bane.

 

Yaad rakh mujhko apni duaaon mein rafeeq

Teri duaon  mein  main ne asar dekha hai

 

 

 

 

kuch Ashaar

Un ke aane se main paa leta hoon khushiyan thodi

Wagarna fikron mein ghiri rehti hai yeh duniya meri.

Kahan rehti hai hum ko ab khud ki bhi  khabar

Bhula deti hai sab ko yeh  zamaane ki fikar

Rehta  nahin  hai  yaad  mujh  ko  ab amal mera

Mere haafize pe nahin chalta hai ab dakhal mera

Huway hain Umr ke is muqaam pe ab sab door door  

Dekh ke jaata hai  ab door mujh se haafiza bhi mera

Kareinge ge dher si baatein milenge jab hum aur tum

Bas ek kaam yeh karna mobile na saath laana tum

Guzar  rahe hain pal ban ke din, hafte, mahine aur saal

Kuch bhula dena hai behtar,  kuch ki yaadein be misaal

Karte hain zulm aisa ke dil mein basay  hain woh

Rehte hain ab wo door door kehne ko hain azeez

Bichde hain tukde dil ke, yeh duniya ka hai kamaal

Zinda hain is ummeed pe ke jald  ho ga phir wisaal

Tum yaad rehtay ho magar hain tehreer se qaasir

Hain masroof itne kaam mein ke bas nahin chalta

Jatan koi kaam na aaya mera unko manaane mein

Na khidmat , na rishwat , na qudrat  aur  na qismat