MUJHE MAALUM NAHIN

Kiya jab hai rishta,  to phir  nibhaaya hai samjho

Todna  jodna  hai  kya , mujhe  maalum nahin

 

Hum  to  karte  hain  sabhi  se ek  jaisa  sulook

Kaun achacha bura kaun, mujhe  maalum nahin

 

Mujh  tak  aati  hai  jo  raah  badi  seedhi  hai

Log chale Raah tedhi, mujhe maalum nahin

 

Karein  chaalaki , dein  dhoka  ye  sab  kis  ke liye

Iska faayeda hai kya ?  mujhe   maalum  nahin

 

Hai agar khush koi , to jale   kyun yeh  duniya

Mile  kya   jalne se,  mujhe  maalum nahin

 

Jhoot bolte hain kyun sach ko chupa kar ke log

kab sach jhoot  se haara ,mujhe maalum nahin

ASHAAR

Jannat ul firdaus mein inhein rakh aye Rabba mere

Bade sachche aur saaf go bande thay  Abba mere

Teri taakeed pe, uth jaata hai  haath dua ko

Karega mere saath tu jo behtar hai, pata hai.

Kya ghabraana, mushkilon mein ghira hoon agar

Har takleef ke peeche,  rakha hai tu ne kuch ajar

Chale aao jab dil chaahe agar hum se mohabbat hai

Mohabbat  ke  gharon  mein  darwaaze nahin hote.

 

Jo kehna hai wo ab kehte hain message bhej ke hum ko

Dua is  ‘phone’  ko  jis  ne  hai  kardi  un ki  bak bak  kum

Dekha hai nau jawaano ko bhi moonh latakye baithe hain

Na samjho hum hi  is duniya mein  sirf bezaar  baithe hain

 

Pareshaani  ke  aalam  mein  Rab  yaad  rehta hai aur  sab ko bhool jaate hain

Jab milti hai raahat to hamein sab yaad rehta hai aur Rab ko bhool jaate hain

Ab ek doosre  se log  kum hain  guftagu  karte

Chala hai daur aisa har koi khaamosh rehta hai

 

Chal raha tha jis pe tu farishton ki dagar thi

Aa  kar  kisi  shitaan  ne,   teri  raah  mod  di

 

Dekho  Duniya ko  mussanif  ki aankh  se

Har ’zindagi’ milgei  kahaani  liye  huway.

 

Paison se tola jaata hai,  ab kaam jo bhi ho

Har kaam mein ab dil ki baat hoti hai kahan

  

Kai kaam hain  ulfat mein yaar kehne ke

Ab  payar  mein  kum  dil ki baat  hoti hai

(hazaron kaam hain ulfat mein yaar karne ke …yaad aaya hoga )

 

Apni udaan ko tu leja jahan tak pohanche

Tere liye hi hain sab  kaainaat  ki cheezein.

 

 

kuch aur Ashaar

Tha waqt bura apna,  ke ho gaye nakaam

Ki thi yehi koshish ke hum kaamyaab hon

Dekha ye kya jo aankhon se dil mein utar gaya.

Aur dil  jab bhara to aankh se paani  uchal  pada

Kaise rahega awaal,  tu har ek daud mein

Dekh main ne is maidan mein baazi maari

Majboor har insaan hai  yehan,   bebas hai is qadar

Jaata  hai door apno  se kyun,  hum  ko  hai  khabar

Kehne ko suba  kuch  hai  magar  kuch  nahin  apna

Insaan phirta hai maara maara jaane kidhar kidhar

Na bazm apni na saaqi apna na sheesha apna na jaam apna

Agar yehi hai nizaam e hasti to ghalib zindagi ko salam apna

Milegi kab is qafas e ghulami se parwaaz e azaadi hamein

Ghire huwe hain  gardishon  ke ghanay  ghere  mein hum

 

Karoon nafrat to bura yeh hai ke ghussa mujhe aaye

Aur ho chaahat to yeh tai hai ke  mujh ko wo rulaaye

 

Umr jab maut ki dahleez ke paas laati hai

Din  ka  har  pal  guzarta  hai  fikrein le kar

ASHAAR

Bana hukmran to khud ko khuda jaana

Admi behtar hai gar Admi bankar  rahe

Dunia pe hai  hukmaraan  Adam

Par  waqt  pe  zor   nahin chalta

Bhool  baitha  hai   us  taaqat ko

Jiske hukm  bina patta nahin hilta

Nahin jaanta ke hota kyun badnaam  hai naam mera

Jab yeh bazm teri saaqi tera sheesha tera hai jaam tera     (Mirza ji se maazrat ke saath)

Kahan dhoondenge un ko jo lamhe saath beete thay

Kahan aata hai waqt jo guzar jaaye pal ki khushi dekar  

Koi  shikwa  na  karo  aur  shikaayat  bhi  nahin

badalte huwe mausam hain maslehat ke tehat

Kabhi tanhaayee hai bhaayee kabhi ghabraaye dil is se.

Kabhi  mehfil  mein hai lagta dil  kabhi bezaar hote hain

Bura  bana  hai  yeh  aadam  to kuch maslehat hogi

Wa garna duniya mein aane ka phir kya sabab hota

Karte nahin hain waise  hum se   sawaal wo

Jawaab khud hi de dete hain, jab sawaal ho

Kya kaifiat hoti hai is aane aur jaane mein

Ye hum se ziyaada aur kaun jaan sakta hai

Kabhi dil ko tasalli dein kabhi num aankh band kar lein

Kabhi  hum  muskura  ke chupaa  lein dard ko  apnay