Naye daur ka baab khula hai
Har paapi dhoodh ka dhula hai
Nekiyaan sab hoti hain zaaye
Sharifon ka moonh sila hai
Ye kaisa chalan chalaa hai
Har dhongi ka hota bhala hai
Rehte hain chain se dunia mein
Sachay ko dard hi mila hai
Aadmi Aadmi ko lagta bala hai
Nafraton ka zahar ghula hai
Insaaniyat bhooli hai apna sabaq
Logo ka aapas mein dil yun jala hai
Bechaini hai aur ek khalaa hai
Mizaaj har waqt mila jula hai
Zindagi ab kyun bojh si lagti hai
Kabhi aarzu kabhi darr bhi
kabhi sahuq kabhi fikr bhi
Doob ke hi paar niklo ge
Kabhi buzdili kabhi nidarr bhi
Kabhi chup kabhi zikr bhi
Kabhi nashukri kabhi shukr bhi
Kyun naaraaz ho dunia se
Kabhi amrit bhi kabhi zahar bhi
Kabhi shab kabhi sahar bhi
Kabhi sahara kabhi behar bhi
Do chehray yehan sab ke
Kabhi mukhlis kabhi qahar bhi
Kabhi bechain kabhi sabr bhi
Kabhi be rukhi kabhi qadr bhi
Kai tareeqe hain kaam lene ke
Kabhi pyaar se kabhi jabr bhi
Kis ko talab karoon ,khwahish karoon kis ki
Rehbar nahin hai koi , sataish karoon kis ki
Dhong hai chalaawa hai dunia mein is qadr
Kis ka loon imtihaan , azmaish karoon kis ki
Jaazib nazar na koi , farmaish karoon kis ki
Heere to patthar hain, zebaish karoon kis ki
Saare armaan o hasratein dum todnay lage
Kis ka ho izhaar aur guzarish karoon kis ki
Is toote huway dil mein, rehaish karoon kis ki
Matlabi sabhi dunia mein, sifarish karoon kis ki
Khaayee hai chot hum ne, wafa jis se bhi hai ki
Zakham mila zamane se nawazish karoon kis ki
Kis raah rakhoon qadam , paimaish karoon kis ki
Mile hain dukh itne , numaish karoon kis ki
Na khoon mein rawaani na ankhon mein hai paani
Izhaare gham ho karna to barish karoon kis ki
