ashaar

Liye phirte hain ghatri kaanton ki apne kandhe

Aur duniya ko dete hain hum muskaan kaliyun ki

 

Jo achcha hai usay achcha hi kehne mein bhalaayee hai

Magar Jo hai bura, bura kehne mein usko,  buraayee hai

 

 

Kaheinge wohi baat jo apni samajh mein ho

Kareinge wohi kaam  jo hum ko  lage achcha

 

 

Chal jee le is duniya mein ab aur kya rakha

Kyun hota hai is baat se tu hakka bakka

 

Kahan wo maazi  ke zamaane  kahan ye daur aaj ka

Na adab hai na saleeqa na wo tehzeeb o tamaddun

 

 

Thi yeh duniya ki fiza paak har ek cheez thi ujli

Apne  aaraam ki khaatir ise ganda kiya hum ne

 

Thi jab fursat to ganwa diya chup reh ke waqt apna

Ab waqt nahin milta ke unse hum hum kalam ho lein.

ek aur

Kai baatein hain jo reh jaati hain dil mein dab ke

Kahan har khwaab ko dekha hai haqeeqat bante

Kai khwahishein dafan hoteen kafan mein lipte

Har tammana ko bhi dekha hai kab pura hote

Kai armaano ka nikal jaata hai dam sisakte sisakte

Hasratein bhi rah jaati hain haath ko malte malte

 

Yeh kab huwa hai jo hoga kisi bande ke liye  

Hiras karta hai , shukr karta nahin jo usko mile

 

choti nazm

Na wo noor hai ab nigah mein

Na hi shakl mein koi hai kashish

Na zubaan mein rahi chaashni

Na goyaayee mein ab wo baat hai

Na qadam badhte hain tez tez

Na baazuon mein ab wo jaan hai

Na azaad hai ab zehan mera

Na hi dil mein be khaufi rahi

 

Na raha jab apna hi apne saath

To phir ghairon ka kyun saath ho

 

ashar

Raakh ne kaha suraj se  

Tere meri fitrat hai ek lekin qismat hai juda.

Tu bada aag ka gola main zarra hoon bujha

Suraj bola 

Duniya se jo dekho,  mein lagta hoon bada

Kayenaat  ke aage lagoon , daanaa sa pada  

Ho jaaon main masroof koi waqt na ho khaali

Phir  bekal na ho tabiat,  aur koi yaad na aaye 

 

Tandrusti ka yeh aalam hai dard hota hai nas nas mein

Tawaanaayee khoyee hai , yeh laut aaye lage mushkil

Hai dosti mein rasm, sab khata hain maaf

Doston ko bura kehne ki adat tu chor de

Hum likhein khat roz unhein yeh hukm kiya hai saadir.

Jawab ka shikwa kyun kar ho,  hum jo thahray saabir

Liye kheenchte phirte hain anjaan zindagi

Hum jaante hain kya hai anjaam e zindagi

Yehi pal hain ke hum 2 - 4* se do chaar*  hon                 * 2(do) - 4(chaar)   …* do chaar (milna)

Kal ka kya pata kya khabar kab laachaar hon

 

Ashaar

Nikal jaate hain jo pal , ’ kal’  wo ban ke yaad aate hain

Guzare waqt ka aana,  kahan  mumkin  hai  mere yaar

Rozi roti ne banaayee apno se doori

Na jaane ye zaroorat thi ya majboori

 

Meri fitrat mein hai behakna aur badalna  

Teri qudrat hi hai jo sambhaale hai mujhe 

 

Kabhi khushiyan kabhi gham hain hai kaifiat kabhi kuch aur

Yeh duniya hai ,nahin Jannat jahan khushiyun ka hoga daur

Haath badhte nahin ab likhne ko,  thakan ho gayee itni

Dhundhlaayee hain ye aankhein , budhaapa jo aa gaya

 

Main bana loon,  ja ke wahin ghar apna

Mile mujhe jo kahin , ek jegah thandi si  

Chaahe koi mahinaa ho garam chale hawa

Kis ki khata ka yeh asar Mumbai mein huwa 

Ajab si kaifiat mein mubtala ho jaate hum us waqt

Ke taareef ho Javed ki aur sunna Shaukat ko pade

 

 

POEM

Rupiyon ko Rishton se jab bartar dekha

Ajeeb sawaalat ubharte hain khayaalon mein kaheen

 

Kahan le kar chali hum ko yeh laalach aur hawas

Baap ka Bete pe bharosa na Bhai ka Bhai pe yaqeen

 

Aaj ki Duniya to waise hai Aalimon ka jehan

Har aira ghaira bana phirta hai yehan pe Zaheen

 

Sab ne padh likh liya par hai tarbiat ki kamee

Yehi ek baat qaabil ghor hai, hai bahut sangeen                           sangeen = serious

 

Yeh daud aisi lagi hai jo ab ruke na kabhi

Har ek soche hai apni , kaheen khuloos nahin

 

Na jaane hoga kya aage jab ab yeh aalam hai 

Insaan milenge nahin, dhoonde gi jab ye zameen

ASHAR

Jahal ke agar aankh pe jaahalat ka ho naqaab

In  halaat  mein to phir  aayega Allah ka azaab

Dikhaata hai  kai shakal mein woh naarazgi apni

Kabhi  zalzale, toofaan   aur barsa ke kabhi aab

----x--

Dil ki kaifiat hai kuch aisi , ke zard rehta hai

Zamaane ka kya,  abd se be-dard rehta hai

Jab yeh jaante hain hum to , kyun phir bhi

Jaane kis baat se seene mein dard rehta hai

---x---

Guzarta waqt le jaata hai hum se cheen kar apne

Koi bhi pal nahin aisa,  judaayee se jo khaali ho

----x---

Jab doston ki hon sohbatein aur haath mein hon chaar din

To sab se honge bhale wo din aur baaqi honge bekaar din

---x--

Saari umar ko sehte rahe dete rahe jo ghum

Karte hain phir yaad usay is qadar kyun hum

---x---

Jaane kaise nazam mein dhal jaati hai tehreer meri

Kahan kahan se alfaaz ubhar aate hain khuda jaane

 

ASHAAR

Hona hai sabhi ka yehi anjaam ek din

Milna hai sabhi zindagi ko is se ek din

Aati  hai anjaam pe  magar hai ibtida

Ahmiat na hoti zindagi ki Maut ke bin

Kahan milte hain wo log jo tujh ko samajh sake’n

Samjhota kiye baithe hain hum haalaat ke aagay

Kahan fursat kisi ko,   jo haal bhi pooche tera ruk ke

Gaya zamaana wo jab log , hamdard huwa karte thay

Hota nahin hai kuch bhi , jamaa kharch ab hum se

Bazaar mein cheezon ke dekhe daam jo hum ne

Na leta hai khabar koi , zamana hai  magan itna

Yeh aaya daur hai kaisa, ye boya kis ne hai fitna

Kahan fusat koi pooche khabr tu kyun nahin leta

Sunein shikwa to lagta hai koi hamdard  hai apna

 

 

Jo karta hai khuda is ka sabab wo khud hi jaane hai.

Gunahgaar bande hum, kya samjhein hum kya bolein

 

Amal insaanon ka , ab aaj jaisa hai wo sab jaanein

Hamein to kehna hai itna jo tu karta hai bar haq hai

ASHAAR

Ban’na hai agar nek to sangat bhi nek ho

Sohbat  se hi  banti  hai  seerat bhali buri

Log hote hain pareshan agar karte hain koyi kaam

Hum ko hai yeh mushkil ke chutti mein kya karein

Itla agar utla ki na ki to hai  itla ki guzaarish

Itla na mile utla ki to farz  e itla nahin hota

Pareshaan hain , abas mohtaaj hain sab

Mashinon ke aage hain hum aaj be bas

Diwaangi  hoti   hai  khalal   dimaagh  ka

Dil ko yun hi logon ne badnaam kiya hai

 

Moonh ghubaara lagta hai gar wo naraaz hon

Hum jo hanse to poochte hain is ka  hai sabab kya

Dedicated to the families of our shaheed Jawans

Yeh udas udas se zakhm Dil ke

Yeh ranj o gham se bojhal palkein

Liye baithe hain Dard ko  go'd  mein

Yeh Haal hai  Shaheedon ke ghar ke

 

Yeh sookhe dil se nikalti duaaein

Yeh bheege palkon se takti nigahein

Kisi ke namudaar hone ki liye aas

Yeh bas reh jaate hain liye aahein

 

Yeh muntazir  vaadon ke wafa hone ka

Yeh sehte hain sitam in se jafa hone ka

Ummeedon ka dher liye aankhon mein

Yeh nahin jaante sabab khafa hone ka

 

Yeh jo dete hain desh ko socho Kya hai

Yeh Jo lete hain desh se dekho Kya hai

Jaan ki qeemat  kya lagaayein tum kaho

Yeh Jo paate hain dil se poocho Kya hai

 

Sukun milta tha jin se ab wo, kahan milte hain

Murjha chuke hain phool jo, kahan khilte hain

 

Hai MAAZI  ek phata tukda jo judta nahin hai

Bheega hai  yeh aansoo  se ab udta nahin hai

 

Khuda ka shukr hai payee samajh aisi ke hum samjhe

Warna baat teri hoti hai mushkil, zamana kum samjhe

Yek tarfa hai yeh raah , achche din jahan se guzre

Bula ke dekh lo ye wo waqt hai jo mudta nahin hai

Gham aa ke hain behkaate uthaata hoon jab qalam

Liye baitha hoon yeh naama mukammal nahin hota

 

Bahut kaam tha karna baaqi , hote hote huwa hai

Sab Allah ka  karam hai huzoor  aur aap ki  dua hai

Ajab hum log hain abad se, yeh kehta hoon main adab se

Hain  aapas  mein  bhai bhai ,hum sabhi  hain  ek nasab se

Mehmaan hain yehan pe hum hain duniya mein musafir

Phir nafratein hain kyun , kyun dushmani hai be sabab se

 

POEM

 

Dikha ke dhaar ABR ki wo boond boond ruk gaye

Yeh kya tha ke kuch  hi pal  baras ke wo ruk gaye 

Dooba tha dil  apna  ghamon ki  ladaaayee mein

Yaad nahin kitni khusiyan aaein,  kitne dukh gaye 

Unhein meri  justaju mein kai khaamiyaan miliein

Ghuroor ka hai anjaam bura , yeh  soch jhuk gaye  

Ghurbat ke aalam mein chadha , ishq ka bukhaar

Is rog mein  kya janein,  kai Umraa   phuk gaye 

Duniya  ki  talkhiyun  se  hamein   pukhtagi mili

Hum yaad  nahi karte wo pal, jo de ke sukh gaye

ASHAAR

Khairkhwah bahut hain duniya mein magar

Dard  jis ko hai hota yehan , wohi  sehta hai

---x---

Liye baithe thay tanhaayee ka gham tanha hum

Hum se wo milne jo aaye to khushi hum ko mili

---x---

mumkin hai ,ho jaoon mein gumnam kahin

Mere  wajood ka daira  bahut hi  chota hai

----X---

Masrufiat ke jaal mein ab, huwee hai qaid yeh hasti

Bhulaaye baithe hain fursat ki wo susti aur wo masti

Khoye hain bachpan ke suhaane  din kahin main ne

Kahan milni mujhe  , maidaan galiyaan aur wo  basti

----X---

 

Un ka waada tha ke wo aayeinge shab ke dhalne tak

Dekh ke muntazir mein raha aankh ke band hone tak

----X---

Tab sooche gein kuch ,jab fursat milegi  

Ab soojhe nahin kuch , hain masroof itne

KUCH AUR ASHAAR

Waqt ko kya huwa ab , yeh kyun badhta nahin aage

Kisi ne raah mein pal  ki , kahin rodhe bichaaye hain

 

 

Noor nazar  aayega,  yeh  chaand sa tera  chehra

Apne chehre ko kabhi meri nigaahon se to dekh.

Allah ki nemat mere atraaf hain phal  phool aur kaliyan

Mujhe  basaaya  hai usne Pahaad o Darya ke darmiyan

Jahan ki  khushbu se mehke hai  fiza  aur baad e saba

To kyun na hon mujhe pyaari yehan ki raahein aur galiyan

 

Aa jaate hain behkaane ,  uthaata  hoon  jab  qalam

Liye baitha  hoon yeh Naama mukammal nahin hota

Koi ab hai , koi kal na ho , koi kal tha,  koi ab nahin

Isi  qanoon- e- qudarat  pe insaan ko qudrat nahin

 

Karein kaise shikayat hum zamaane ke badlne ki

Jab hona hai fana sab ko, badalna bhi  zaroori hai

 

 

Kab ke mar jaate Faraayez agar deta na Khuda

Yeh rukaavat hai , ke  jis se abhi dam baaqi hai

Aaj ke din ka  mere  dost  yehi  matlab hai

Aapas ki jung tabah kun hai be matlab hai

Chay dahaayee ne yehi baat samjhaayee hai

Ab bhula ke dushmani,  bhaichargi ki talab hai

ASHAAR

Tu khaliq hai tu rakhwaala,  saari  makhlooq ka aye Allah  

Tere wajood ke qaayel hum, reham hum par mere Allah

 

Kuch khote hain kuch paate hain yehi huzoor duniya hai.

Aise hi jeena padta hai , aur yehi dastoor- e duniya hai

Guzre thay kuch mahine par laga kai baras gaye

Phir se barasta dekhne paani ko bha’ee taras gaye

Hamein khabar na thi mausam mizaaj badle ga

Hum khwah mo khwah Des apne is baras gaye

 

Nahin maalum kahan jaa ke tu poshida huwa hai.

Hifz wo aman mein Allah ki rahe yeh  hi Dua hai

Yeh kya jegah hai jo bhaaye hai hamein is qadar

Yeh kya jegah hai jo bulaaye hai hamein is qadar

Lagta hai ke hum rehte hain,  is ke dil mein kahin

Yeh kya jegah hai jo basaaye hai hamein is qadar

Ghata ghanghor chaaron ore chaayee , par ek boond na tapki

Hum baithe  chaata liye takte rahe assamaan,  baandhe tik -tiki

Kabhi chat pe chadhe , ke  baadlon ko  nazdeek se  padh  lein

Ke shaayad ho chupi koi boond ,  gire   maarun jo mein thapki

ABDUL KALAM (EX PRESIDENT OF INDIA)

Bachpan mein baant ta wo akhbaar dar b dar

Milta nahin  tha  khaana ,  do waqt  ka pait bhar

 

Taaleem  ke  liye thi  yeh  sab us  ki  jad  o  jahad

Tha shauq us ko padhne ka bachpan se hi be hadd

 

College mein daakhle ke liye jab na thi raqam

Bahan ne sona baich ke poora kiya bharam

 

Wo shakhs  jis ka  daur e zamaana kal  aam tha

 

Bana wo Sadar Hind ka, naam uska Kalaam tha

ASHAAR

Mile jo waqt mujhe,  poori khwaahishein kar loon

Kahan se laaoon mein fursat jo mere kaam banein

Tere mukhtasar se khat aur  mere jaawaab taweel

Tu  le nuqte se  kaam  aur  lakeer  banaaye  Shakil

TUDIL ab jaayein bhi to kaise,   zid na kar tu dil

Honge  ruswa  abas  ,  rasaayee hai na rasoyee

Pareshaniyan  kyon khaana badosh nahin hotein

Jaane kahan se aati hain ghar karti hain sar mein 

Kya jatan karoon  ke mujh ko sukoon aaye

Koi nazar na aaye jahan tak nazar yeh jaaye

Reh jaaoon main tanha is jahan ki bheed mein

Na main kahin pe jaaoon na koi mujhe bulaaye

Apni do satron mein hum kaise karein duniya ki baat.

Mumkin kahan hai dariya ko laaye koi kooze mein ab

Kaisa yeh ek tarfa hai apne likhne ka amal.

Khat to likhte hain magar jawab na aayega kal

 

Allah taufweeq mujhe de ke tujh sa main banoo

Tu ne Duniya mein bhi jannat ki jegah paayee hai

Duniya ko jo dekho to na jeene ko jee chaahe

Dekhoon agar mein tum ko to jeena mujhe bhaaye

Har waqt teri tasveer nigahon mein rahi

Din guzarta hai ab aur na raat dhalti hai

Tera khayaal hamein sone nahin deta ab

Neend hum ko is haal mein kahan milti hai

 

Haseen

Kahan se le ke hai aaye ho ye  haseen chehra

Yeh be baaki adaaon mein aur fitrat bebehra

yeh khilkhilaati  hansi  aur khanak lafzon mein

yeh andaaz munfarid sa,  aur lehja thahra

 

yeh chandan sa badan zulfon ka rang sunehra 

Umadhti khushbu badan ki jaise baandha sehra

Kiya hai kitno ko pagal banaaye majnu kai

Milenge khaak chaante yeh  jangal aur sahra

 

Phool se jhadti baaton ka hota asar gehra

Sun ke mehzooz na ho  jo, woh thahra  behra

Kab ye hota hai  ke  shakal aur aqal  yek  ja ho

Rakhey ho  kai  khazaane rehte ho  be pehra

 

LOG AAJ KAL

Jaane kyun  aankhon mein kuch nami si hai

Logon ke dilon mein pyar ki kuch kami si hai

 

Kal talak thi  tez raftaar un ke aane jaane mein

Aaj yakayak ye aamad o raft kuch thami si hai

 

Thay pur khulus,  milte thay jo garam joshi se

unki mulaqaat ki garmi pe barf kuch jami si hai

 

Shikaayatein cheen leti hain khushiyaan hum se

Rehne de agar doston mein kuch berehmi si hai  

 

Ye reet hai jehan ki , ye zamaane  ka  chalan hai

 

Ye  Jaan  ke  sabr  huwa , kuch  khushfahmi  si  hai