past is past

Tere dil ki wasaton ka zikr kya

Ke tu chot kha ke bhi khush raha

Rahi baat meri to sun le tu

Ke main khush reh kar bhi na khush raha

 

Main chala tha paane jahaan shaad

Ye judaayee ka meri bana sabab

Ise paa kar gham mile har qadam

Ye buraayee ka meri bana sabab

 

Wo nazar ka meri suraab tha

Jo dekha tha ek khwaab tha

Jise samjha khoob, kharaab tha

Jise khoya wo laajawaab tha

 

Ab zamaane bhar ki hain thokrein

Chahe kaam hum ab jo karein

Magar shikwa ab hum kyun karein

Chaahe jee uthein ya ab marein

 

Huwa door wo jo qareeb tha

Main ne paaya wo jo naseeb tha

Ye waaqiya bhi kuch ajeeb tha

Ke bana rafeeq jo raqeeb tha

 

Mere dil ko ab ye malaal hai

Tujhe paa sakega na ab kabhi

Jo guzar gaya tu wo waqt hai

Ke jo aa sake ga na ab kabhi

DEDICATION TO A FRIEND

Jis pal maazi khayaalon se guzra

Wo lamha hamein bahut baar guzra                      baar = bojh ki tarah

 

Murjhaaya hai zindagi ka yeh gulshan

Khizaan hi khizaan hai daur e bahaar guzra

 

Wait….let us dedicate this to our friend Kalam who passed away...

 

Jis pal maazi khayaalon se guzra

Wo lamha hamein bahut baar guzra                      

 

Jashan hum khushi ka manaenge kaise

Jahan se hamaara ek yaar guzra

 

Murjhaaya hai zindagi ka yeh gulshan

Khizaan hi khizaan hai daur e bahaar guzra

 

Jawaan jis se rehti thi mehfil e yaaran

Wahi dil ko thaame hai dildaar guzra

 

Gham e shab o roz sunaate thay jis ko

Be panah gham de ke wo ghamkhwaar guzra

LOG AAJ KAL

DHONG HASAD KEENA AUR BE IMAANI

DUNIYA IN BATON SE NA BAAZ AANI

 

DHONG HAR AADMI NE APNAAYA

HAIN INSAAN MAGAR KAAM KAREIN SHAITANI

 

HASAD KI AAG MEIN LAGE JALNE

PAAYA KISI KO JO LAAJAAWAAB LAASAANI

 

KEENA RAKHTE HAIN LOG AAPAS MEIN

DIL SIYAAH HAIN NAHIN YEH NOORAANI

 

BE IMAANI IS JEHAAN MEIN KYA KAHIYE

UTH GAYA HAR DIL SE KHAUF E REHMAANI

ZINDAGI MEIN

Ban jaaye koi rehbaar sunsaan zindagi mein

Ummeed e gulsitan bandhe veeran zindagi mein

 

Aitbaar karein kyunkar mehboob ho ya dushman

Karte hain sabhi qatal ka saamaan zindagi mein

 

Apnon se thais paana hai reet is jahan ki

Hota hai kyun tu is qadar hairaan zindagi mein

 

Apne mufaad ke liye har shakhs bana haiwaan

Milta nahin hai dhoonde se insaan zindagi mein

 

Ghalib hai yehan fikr e maash fikr e deen par

Phir bhi nahin hai koi pashemaan zindagi mein

 

Husn e ikhlaaq wafa aur khuloo kya hai Shakil

Sab kuch bhulaaye baitha hai naadaan zindagi mein

ARMAANO PE PAANI PHERO

Guzar raha hai waqt hum ko  kamzor kare

Haalaat saamne khade hain munh zor kare

 

Bahut se kaam hain baaqi jo hum ko karna hai

Kai ahsaanon ka khamyaaza hum ko bharna hai

 

Bina matlab ke madad Duniya mein koi na kare

To mera farz hai koi mohsin mera aahein na bhare

 

Zindagi mein hai yeh koshish ke ada farz karoon

Maar ke apni khwaahishon ko ada qarz karoon

 

Is liye karta hoon dua mein  hamesha Rab se

Koi ahsaan na ho mujh pe , bacha tu sab se

 

Meri khwaahishon ko mein khud mita phekoon

Mere armaano pe beshak mein paani pheroon

 

Umad umad ke jo aaye hain  aasmaanon pe

Kaash barsein ye baadal mere armaanon pe

KUCH AUR ASHAAR

Wah re un ka bayan-e Tanz-o-mazah

Lutf  lene  ko  lughat  dekhni  padi

---X---

Sadiyun se jo na sulajh payee

Zindagi  naam hai ek paheli ka

----X----

Majbooriyun ke tehat hain jo sab aaj bichde

Kuch aur nahin  yeh , mere dil ke hain  tukde

 ----X----

 

Dil ko takleef jab dena hoti hai Dimaagh ko

Yeh  chala  jaata  hai  maazi ki  yaadon mein

----X----

Fikrein shab o roz ki , hamein deewaana banaaye

Lagta hai ke deewaana hi ban nay mein maza hai.

----X---

ON BIRTHDAY =

Rehte hain roz  hum , jawaan bane huwe

Yeh ek din hum ko bana deta hai boodha

----X----

Hairat hai hum ab tak na insaan bane

Sadiyaan huwi hain yeh jehaan bane

----X---

Dikhaane  ko  honge  mere  ashaar   kuch

Jahaan mein koi pooche tum kya kar chale

---x---

Yeh Duniya ki mushkilein aur Aasmaano ki lazzatein

Darmiyaan  mein  bechaara  ibn e Aadam  pis  gaya.

--x----

Garmi hoti hi is liye hai ke pareshan hum hon..

aur jahnnum ki yaad aaye ke gunah kum hon.

----x---

Zindagi kat rahi aahein bharte

Roz aati hai maut nahin marte

Hadd hai tere sitam ki  duniya

Laash hoon dafn kyun nahin karte

 

ASHAAR

Mujh se hon poori zarooratein dardmandon ki

Allah taufeeq de madad karoon tere bandon ki

---X---

Un ko hai itmenaan ke faarigh hain farz se

Yehan sunaatein bhi hamaari hain adhoori

----X---

Karte  hain  justuju  ke likhein  hum  bhi  pur asar

Qalam  mein  gayee  sookh  siyaahi  hai  ab  magar

----X---

Dil  ki  sunein  to  hum  ko  ye   majnoon  banaaye

Hum aqal se lein jo kaam to dard hota hai Dil mein

---X---

Kehne ko chupa baitha hai dikhta nahin hum ko

Sehta  sabhi  jazbaat  hai  chup  chaap  Dil  apna

----X----

Zindgai  tere sawaal  nahi  thamte

Thak gaya mein jawab dete dete  

-----X---

Yeh  haqeeqat  hai  ke sapne, sapne hi  hain hote

Lekin almiya hai ke sapnay , haqeeqat nahin hote

----x-----

 

BAHUT ADAB KE SAAT -MADEENA HAI AANA

Gham aur khushi se  paray  hai yeh haalat

Na koi hai  shikwaa  na hai  kuch shikaayat

Rahe  justaju  yeh  ke  ho na  ghalat  kuch

Amal  us  pe ho  , jo   Aap  ki  hain  hidaayat

 

Nahin khojate  hum ke kya hain hikaayat

Kaha  Aap  ne hum  ne  maana  haqeeqat

Hai imaan mazbut aur pukhta yaqeen hai

Padha  hum  ne hai jab qalma e shahadat

 

 

Bhejein durud har haal mein ho ye aadat

Karein  Aap ko  yaad , jab  jab  ho  ibaadat

Ke  milta  sukoon  hum  ko hai  is karam  se

Aur  milti  hai  dil  ko  bhi ek  khaas  raahat

 

 

Aqeedat hai mujhe ,Aap se hai muhabbat

Mein adna sa banda,  hai yeh meri chaahat 
Mujhe  apne  paas  aap  jald  ab  bulaaein  

Madeena  hai  aana,  hai  yehi  ek  hasrat

MAIN ???

Naye zamane mein ‘Adab’ tehas nehas hoga

Buraayee mein mulawwis  har  nafas  hoga

 

Tarbiat  aisi  mili  thi ,  sabr aur shukar se jiye

Dil pe qaabu rakha ke shikaar e hawas hoga

 

Banaaya  mushkilon se hum ne Ashiaane ko

Khabar  na  thi  ke  hamaara  yeh qafas  hoga

 

Zindagi  guzaar  chale,  faraiz   ada na  huway

Nahin jaante thay aana Duniya mein abas hoga

 

Mujhe pata na tha ke baad marne  ke mere

Logo  mein  amal  mera  baa’ ise  bahas hoga

FUNNY ON SMART PHONE

Gift mein smartphone hum ne jab se begum ko diya

Tab se dil ko mila sukoon chain ka saans hum ne liya

Kabhi  kabhi  sahi  faisle  bhi  dair  se huwa karte hain

Dair aayed durust aayed ke qaul pe faisla hum ne kiya

 

Ab sar se mere har waqt ki kud kud, aur bala hai  tali

Mujh ko ab  jaise  sahi maano  mein  azaadi hai  mili

Jo  ghar  hote  huwe  bhi  Jail  sa lagta  tha  mujhe

Us ka har Dar hai ab khua aur har Khidki hai khuli                       dar = darwaza

 

Har waqt  haath mein phone aur sar jhuka milta  hai

Begum ka chehra hamein ab kum hi utha dikhta hai

Jo  angutha  hamaare  kuch  kehne pe uth jaata tha

Woh ab saara din whatsapp pe message likhta hai

 

Hai  inaam ka haqdaar jis ne smart phone  banaaya

Kai logon ke dil  se pareshaani ka hai bojh hataaya

Phirte hain dandanaate sabhi shohar ab ghar mein

Door rehta hai ab sar se jo biwi ka khauf tha chaaya

 

NEPAL

Chal  raha  tha  maamoul  pe  sab  kuch

Zindagi thi, lage thay saath  sukh  dukh

 

hawa khamosh thi pursukoon thi zameen

Qudrat ke amal mein na tha ghazab kahin

 

Ke  achaanak  huwa ek qahar sa  barpa

Munjamid  pahaadon  se  baraf  barsa

 

Zalzalon se har taraf lagi zameen hilne

Makaan dhaa gayee ye harkat jaane kitne

 

Manzar tabaahi ka dekh bhigi aankh

Log  ghar se  be ghar  huwe  kai  lakh

 

Hazaaron jaan se gaye aur huwe kai zakhmi

Sare  Nepal  mein  chaa  gayee  bud  nazmi

 

Nepal ki haalat yeh kahaawat yaad dilaati hai

Museebat ko aana ho to har taraf se aati hai

 

Zalzale ka asar kya kum tha jo us pe barsa paani

Thay be ghar jo unke liye yeh aafat thi naaghaani

 

Dua karein ke aisa waqt kabhi kisi pe na aaye

Jise sehna bhi ho mushkil aur kaha bhi na jaaye.

FUNNY REPLY TO A FRIEND WHO IS INSISTING TO COME TO MUMBAI

Hai aane ka iraada, is saal Mumbai

Magar chutti ka, nahin pata bha'ee

 

Kareinge koshish ke barsaat mein ho

Aur aanaa mera Jumme ki raat mein ho

 

Magar sochta hoon kyun Mumbai jaaoon

Wahan kaun baitha jise soorat dikhaaoon

 

Milunga jo aa ke tujh se to hoga fazeeta

Mujhe aaye huway ab hai ek saal beeta

 

Tu karega shikaayat main kyun late aaya

Aur maange ga mujh se kya main Date laaya

 

Aur jab main kahoonga ke main yeh bhoola

Maar ke tu banaayega mujh ko langda loola

 

Jaa aataa nahin  ab main Mumbai ko teri

Kyun peeche pada hai, ab tu jaan ko  meri

DIL

Dil hamaara jo hai seene mein

Markazi kirdar iska’ jeene ‘mein

 

Khoon  daudaana  hai  kaam iska

Logon mein hai charcha aam iska

 

Dhadke hai jab pyar kisi pe aaye

Dukhe hai  dhoka jab koi khaaye

 

Kanjoos aadmi ko kahein dil chota

Sakhi aadmi  ka Dil hai badaa  hota

 

Ho bahadur to kahein  dil mazboot

Jo ho darpok kamzor dil ka wajood

 

Kya  kya  kaam  yeh  kar jaata hai

Har jegah naam yeh kar jaata hai

THODE SE

Toota hoon is tarah ke ab mushkil hai jodna

Bikhar gaya hai  kuch is qadar  wajood mera

----X---

Hai oonchi udaan aaj to kal hoge zameen pe dher bhi

Aanaa zawaal sab ko  hai chaahe ho ab ya lage der bhi

----X---

Milta nahin hai  Insaan, mukammal jehaan mein

Khaamiyaan aur khoobiyaan sab ka naseeb hain

----X----

Mera kaha tujhe aata hai samjh mein yeh mujh ko hai pata

Tujhe  samjhaane  ki  koshish  mein  karoon  phir  kyun  kar

----X---

Agar hote hum zaheen to kya kya karte

Dekh ke  kya  is kund zehni ka haasil hai

 

ARZ HAI

Aina dekh ke soorat sanwaar li hum ne

Seerat sanwaarne ka aaina nahin bana

-----x------ 

Sunte hain safar zindagi ka hota hai bahut khoob

Hum ko hi shayad “khoob” ka matlab nahin pata

----x----

Li jo taaleem wo tarbiat kab amal aayegi

Jaane kab hum ko mere dost aqal aayegi

 

----x----

Khwaahishein dil mein daba rakhne se kya haasil

Kar jadojahad to honge poore armaan tere dil ke

----x----

Aamaal ka tujhe apne, hai  dena  hisaab jaakar

Deta yeh sada mujh ko hai mera zameer aksar

----x----

Likhaayee dekhne ab tarstee hain aankhein

Tere khat ko dekhe ek arsa huwa hai

----x---

Na khat aatey hain na ab taar aaye

Lifaafon mein band na ab pyaar aaye

Muntazir koi aankh na ab daakiye ki

Mahine ke din hon ya tehwaar aaye

---x ------

 

Thay jab hum tanha to phailaaya khud ko

Huwee jab se shaadi hum tang ho gaye hain

----x----

Jab hain par to tum ab parwaaz karlo

Ye kat jaayeinge jis din shaadi karoge

kuch aur arz hai

Hum  pe  Maula  tu  kar  Reham o  karam

Hum ko milte hain ghum qadam b qadam

----X----

Ab  hum  ko  nahin   hai  kisi  se  koi  ummeed -e -raahat

Har Shajar mein kaante lage hain aur Samar pheeka hai.

 -----x------

 

Shaamil hon jis mein uljhanein pareshaaniyaan veeraaniyan

Mansoob   karun   kyun  mein  tere  naam  is  tanhaayee   ko

----x---

Gham ke lamhe hon ya  ho  udaasi  chayee

Ghadi yeh  kahan  rukti  hai yeh guzar jaayegi

Bure waqt mein ghire ho to ghabraana kaisa

Shaam khud dhal ke ek nayee subah laayegi

----x----

Hamari begum se bhi  kabhi apni chat ho

Topic bhale hi love na ho chalo hate ho

Kahaan  hum mein  wo qaraar ab baaqi

Ke fix chat mein  koi    dinner ki date ho

-----x-----

Hum  Ghalib nahin na Mir na Momin hain Shakil

Shaer khud kehte hain  khud sunte hain , khud saraahte hain.

------x----

Jis daur mein aana huwa apna  wo daur hai afra tafri ka

Ab aaye mazaa kya shaeron mein jab NET hai samaaN tafrih ka

----x---

 

Tujhe mein kaise bataaoon teri manzil ka pata

Chuna jo mein ne tha raasta  woh  tedha nikla

 

----x---

 

Utha mein tere jo dar se to phir uth jaaoonga

Mera  thikaana  nahin  koi  tere  ghar  ke  siwa

 

-----x----

 

Ranj o gham fikr e zaroorat mere tu sar pe na de

Dher ho jaaoonga,  khaak ka mein hoon putla

 

---x---

 

Alag sa hota hai ek pal se doosre ka mizaaj

Zare zare mein qudrat ne tabdeeli bakhshi

 

----x----

 

Koi  takhleeq  khuda  ki  nahin  yaksaan  dekhi

Badalti har cheez yehan zindagi ya mausam ho

 

EK AUR

Tu  sabr  kar ,  tera  amal  koi  shakal  to le

Mayyus kyun hota hai ,Rab hai bahal to le

 

Ab kaun muntazir hai tera rok qadam ko

Thokar lagi hai tujh ko tu ab sambhal to le

 

Samjha nahin hai tu,duniya ke dhokon ko

Tareekh  ke  panno se tu  thodi  aqal to le  

 

Hoti nahin hai Duniya mein izzat shareef ki

Mere dimaagh se yeh khalal ab nikal to le

 

Ghairon se door rehta hai apno ke hai qareeb

Samjhta jise tu apna hai  rishta badal to le  

 

Daulat luta ke baitha hai, kyun tu khaali haath

Maana  bura hai  sood,   magar  tu  asal  to  le

ARZ HAI-

Apni marzi ke bhi hum, ab maalik na rahe

Zamaana taad raha hai hamaari harkat ko

---X----

Na tareef huwi na tanqeed ki

Hamein Jin se is ki ummeed thi

Hum likhein to wo ab kis liye

Ab zaroorat nahin shaer o tamheed ki

----X------

Jaane kab hoga khatam silsila imtehaano ka

Zindagi har qadam par hum ko aazmaati hai

 ----x----

Karne baithe thay hum un ki taareef magar

Dil ne zubaan ko diya hukm khamosh raho

-----x-----

Koi  lamha   na  udaasi   ka  mujhe   choo  guzre 

Gar khayaalon ko apne main haqeeqat dekhoon

----x-----

Dil ki gehrayee ka ilm nahin hai hum ko

Jo bhi dard samayaa hai na nikla bahar

----x------

Darte hain log jehan se kaam kiya jo ghalat

Ye na hota  kabhi  gar khauf  e  Khuda rehta

 

PESH HAI

Mayaar insaaniyat ka har taraf hai khasta bahut

Naye daur mein  aadam  huwa hai  sasta  bahut

 

Yeh  har  rishtey  ki  ahmiat  ko  bhula  baitha hai

Sirf kaam ke logon se rishta iska hai pukhta bahut

 

Agar jeena hai is daur mein to BEHISS ban ke jee

Hassaas ko lage gar chot to phir hai dukhta bahut

 

Sirf  chand  dino ki  zindagi  hai chalo  raah seedhi

Buraayee apnaayee to lage lamba hai rasta bahut

 

Rehte hain pareshaan is duniya mein siyaane sabhi

Sirf Deewaane ko taufeeq yehan hai  hansta bahut

GHALIB KI ZAMEEN PE

Aaj bin kaam unka bulaawa kya  ajab na huwa

Kabhi bulaana hamein unka be sabab na huwa

 

Kabhi  do  bol  hi  wo  hans  ke  bolte  hum  se

Hamaari qismat mein aisa kuch ghazab na huwa

 

Kyun rahe hum nazar mein hamesha se haqeer

Un ke dil mein kabhi khayal hasab nasab na huwa

 

Karte  nahin  hain un pe hum ,ab  aitbaar kabhi

Na khaaya dhoka ho hum ne,  aisa kab na huwa

 

Log  kehte hain  aksar  ke tum  bach  ke  raho

Koi  na koi ilzaam hoga  phir,  agar ab na huwa

 

Un ki  har ek  baat  ko  maana  tha  sahi  hum ne

Woh bu’t  hi raha nazar mein meri,  rab na huwa

 

Hum  se  kehte  hain ,  hud mein raho ae Shakil

Sulook un  ka  kabhi  hum se  baa  adab  na  huwa